العودة   منتديات المصطبة > الأقسام الأدبية > منتدى الحب والرومانسية

منتدى الحب والرومانسية مواضيع الحب والرومانسية وكل ما يتعلق بالحب وأنواعه وأروع ما قيل فيه من كلمات

مفيش حد عارف حاجة

كاتب الموضوع: mahna2009، فى قسم: منتدى الحب والرومانسية


1 
mahna2009

عارفين
الشعور ده

عارفين لما تفتكر حاجه كده
تحس انها بتشدك لذكريات
انت مش عارف ايه الذكريات دى
بتشدك لحاجه كده
بحاجه انت مش عارفهاا
و ممكن تدخلك فى شعور كده غريب


حزن مع الم مع فرحه

الشعور ده
....عارفينه


عارفين
لما تسمع اغنيه كده

تلاقى نفسك بتبتسم من غير سبب
بس جواك حزين اوووى
و تلاقى شعور بدأ يدخل جواك
انت مش فاهمه
و تحاول تفهم ايه ده
وفى الاخر متفهمش

عارفين
لما تروح تقف على البحر كده

وتاخد نفس عمييييق
بعديها تلاقى نفسك بتبتسم
بس جواك حاجه مش قادره تخرج
حاجه يمكن بتقطعك من جوه
و مش عارف تتخلص منها
عارفين الشعور ده


عارفين

لما تبقى لسه صاحى من النوم

اليوم لسه مبداش اهو
وتلاقى نفسك على السرير لسه
و غصب عنك تنزل دمعه
ممكن تفضل ساعتين تعيط على المخده
المخده اللى تعبت مننا كل يوم
كل يوم يتحس بينا
قبل ما ننام
و تقوم من على السرير
و محدش يعرف حاجه
عارفين الشعور ده


عارفين
لما تكونوا اصحاب متجمعين فى يوم كده
و كلكوا مهيسين و بتضحكوا
و اللى يشوفكوا من بعيد لبعيد
يقول الناس دى رايقه
وحياتها تمام اوى
و انتوا اصلا بتضحكوا بدل ما تعيطوا
و محدش حاسس بحاجه
و محدش فاهم حاجه
لا و ايه
محدش هيقدر اصلا
انه لا يفهم ولا يحس اللى جواكوا

عارفين
لما تكون الساعه 2 بالليل

و البيت كله نايم
بتبقى عايز تصرخ بأعلى صوتك
كفاااااااااااااااايه .....حراااااااااااااااااااااام
كفايه بقى...ما خلاص..
حرام عليكوا اوى كده
بس كفايه ايه..معرفش
كفايه و خلاص

عارفين
الشعور ده

لما تكون راجع من يوم خاص اوووووووووى بالنسبه
ليك

و ترجع..متحكيش لحد من اللى فى البيت على اللى حصل
و يمكن متحكيش لحد خالص
و يمكن اصلا محدش يسالك
ولا يقولك تعالى يا حبيبى
عملت ايه
احكيلى ابسطنى معاك
تبقى عايز حد جنبك اووووى يفرح معاك كده
بس متلاقيش
و تروح قبل ما تنام تراجع اليوم ده كده
لقطات بسيطه
و فى ااخر يوم اجمل من رائع
و انت جاى تنام...تقعد تعيط
مع ان فى ناس كتييير يحسدوك على اليوم ده

عارفين

لما تحس انك عايز مساعده من اى حد
اى انسان
اى مخلوق
حاسس انت بتغرق
بتغرق فى ايه مش عارف
بس انت محتاج مساعده
محتاج حد ينجدك
مش عارف هتطلبها من مين
و حتى لو طلبت مساعده
هتتقوله ايه
عايزك تساعدنى و خلاص
هيرد و يقولك اساعدك فى ايه
تقوله حاسس انى بغرق
الحقنى
هيقولك بتغرق فى ايه
ما انت واقف قدامى اهو
انت محتاج مساعده
بس مساعده فى ايه انت مش عارف
و تفضل تغرق و مش لاقى مساعده
عارفين
لما تكون عايز تسمع كلمه معينه مش شخص معين
كلمه ممكن تكون كلمه من حرفين بس
مش صعب عليه يقولها
وتلاقيه ولا بيتكلم
تحس انه تمثال
ما تتكلم بقى
طيب ما هو انا شايفاك بتقولها مليون مره
شايفها فى عينيك
حاسسها اوى
عايز تسمعها بقى
قوووووول
اتكلم
و لما يتكلم
تحس انه بيشفق عليك
!...بتشفق على
طيب لما انت كده
بتحسسنى بيها ليه من الاول اصلا
بتعيشنى فى الشعور ده
ليه من الاول..و لو للحظات
لما ده مش حقيقه

عارفين

لما تلاقى نفسك كده
عايش شعور جميل اوى
مع نفسك
انت بتحب جديد
انت عاااشق
بس اللى يضحك
مفيش حبيب
انت لوحدك
بتحب و خلاص
هو انت اااه بتحب
بس اللى بتحبه ده مش موجود
طيب هو فين معرفش

عارفين
لما تبقى عايز تسمع صوت حد معين اووى
واحشك اوى
عايز تسمع صوته
تطمن عليه
و تفضل مستنى
ياترى عارفين الشعور ده ؟
و مستنى..... ومستنى
و فى الاخر ميتصلش
لا و بعدين يتصل حد تانى
تقول اخيرا اهو
و ترد بلهفة
و تسمع صوت حد تانى
مش ده اللى كنت مستنيه

يا ترى عارفين الشعور دا




3 
عيون حائره

يااااااااااااه عارفاه كووووويس جداااا الشعور ده
ومريت بيه كتير وساعات مش ببقي عارفه ايه سبب الشعور ده

ساعات بعيط وانا مش عارفه بعيط ليه وساعات ببقي عايزه اصرخ واقول كفايه كده
وساعات كتير بحس ان محدش حاسس بحاجه ولاهيحس بحاجه
وحاجات كتيره جدا

ميرسي مهنا علي التوبيك الرائع


4 
شمس الحياة

عارفينه وحاسينه من الالف للياء شعور بالخنقه من ايه معرفش عايزه اعيط ليه معرفش يمكن بيبقى فى ساعات كتيره لو بكينا هنرتاح بس بنفضل فيها الجمود عشان بس نثبت لنفسنا اننا اقويا وبعدها ممكن نعيط من غير سبب افتكر بيبقى حاجات كتير اتخزنت والروح ما بقتش قادره غير على الدموع ثانكس مهنا موضوع اكتر من رائع


5 
mahna2009

اقتباس: المشاركة الأصلية كتبت بواسطة wana maly  مشاهدة المشاركة
موضوع جميل يا مهنا بس فى الاخر معرفتش حاجة برضه

الاجمل وجودك يامديرنا
احلى حاجة ان محدش عارف حاجة
نورت يادرش



Powered by vBulletin® Copyright ©2000 - 2018, Jelsoft Enterprises Ltd.
المواد المنشورة والمكتوبة فى المنتدى لا تُعبر بالضرورة عن وجهة نظر القائمين عليه ولكنها تعبر عن وجهة نظر كاتبها فقط.