العودة   منتديات المصطبة > الأقسام العامة > منتدى النقاش الجاد

منتدى النقاش الجاد ناقش معنا بهدوء وبدون تعصب أشهر وأهم القضايا والمواضيع التى تشغل الجميع


1 
ثائر الا ربع

السلام عليكم اولا ....انا بقالى فتره طويله اوى مدخلتش المنتدى عشان شغلى ومرسى والاخوان واخدنى شويه............انا كان اسمى فى المنتدى (مواطن مخنوق) سابقا ......مبدأيا يارب تكونوا بخير وازيكوا...

أبدأ بأولا اعتراضكوا على التظاهرات عموما......ان اعتبرتوه تعبير عن الرأى فاحنا متفقين ان اعتبروه بيعطل الانتاج فالإخوان اما بيتظاهروا مبيعطلوش ولا ايه....ثانيا يجب ان ينساق رئيس اى دوله لمطالب اى فئة م الشعب ويصل لحل يرضى جميع الاطراف (مبارك المخلوع عمل كدا اما الثورة قامت على فكره مش مرسى اللى بتقولوا بيصلى وحافظ القرآن مع ان اعماله لنفسه مش ليا) مش يخطب فى اهله وعشيرته وغيرهم يقول عليهم 67524 فى حارة مزنوقه ويقول شوية اطفال شوارع فى محمد محمود مموليين وهنجيبهم ..ياساده مفيش رئيس محترم فى دولة محترمه يقول كدا على شعبه المفروض يعمل من اجل اطفال الشوارع دول ويحتضنهم ويساعدهم مش يقول ممولين دا رئيس كدا يليق بشيخ حاره مش رئيس دوله ..ووزير اعلامه يطلع على قناة دبى يقول للمذيعه ياريت متبقاش سخنه زيك ووجدى غنيم وعبدالله بدر وامثالهم يستحلوا الدماء ويقولوا اقبح الالفاظ ومحمد حسان يحرض من كام يوم ويدعى للعسكر على جبل الرحمه ودلوقتى يدعى لمرسى ويقول هنزل ملايين الشباب وتقولوا عليهم بيمثلوا الاسلام وكلامهم وقيمهم واخلاقهم لا تليق بإسلام حد والملحدين زادوا ولما نيجى نعقب بأدب وننتقد يقولوك دا عااااااالم ارجع مع انه مش معصوم ويتقال علينا كفار مع ان الله اعلم مين فين احسن عند ربنا.....

ثالثا من اين اتت الوعود ..من وعد بحل التأسيسيه فى برنامجه الرئاسى (هل تعرفون كيف شكل مجلس الشعب هذه التأسيسيه فى اربعة ايام فقط)....من وعد برفع الديون عن الفلاحين ....من وعد بتوفير 200مليار جنيه ....من وعد بمشروع يسمى النهضه ...من قال القروض حرام ثم احلها الان ....من وعد لن يقصف قلم ولن تغلق جريده فى عهده ...من قال قبل توليه الرئاسه اتمنى ان يثور الشعب ضدى اذا ثورت على الدستور والقانون ..ولو عايزين تسمعوها باسم يوسف فى الحلقة التانيه من برنامج البرنامج جابهالوا من فيديو قديم ليه قبل توليه الرئاسه...من وعد بالتوافق الوطنى وغيرها من الوعود الكتير.....


رابعا تبقى لسا متعلمتش اى حاجه لو فاكر ان الاخوان جماعه اسلاميه مش سياسيه بحته وبيستغلوا الدين لشغل مناصب وخلافه بدليل ...بدايتهم بعد الثورة فتوى المحلاوى بقول نعم فى اول استفتاء للدستور.....الاخوان فصيل ثورى ولكن لمصلحة الجماعه والوصايا العشر وليس لمصلحتهم الشخصيه وان كانوا عملوا حاجه صح الا ان الغلط اكتر بكتير اوى م الصح والتاريخ شاهد .....

خلونا بقى فى دستور مصر الثورة (من بعد الاخوان ما مسكوا فمحدش يقولى ثورة) هقولكوا ليه مرسى اما جه رئيس ...جه عن طريق صناديق وانتخابات ينظمها الدستورية والقوانين لا الثورة....مرسى اقسم على احترام الدستور والقانون دا علنا لا على مخالفتهم....مرسى قال فى مذبحة الجمل هو وكل شلته دى لا اعتراض على احكام القضاء وكان بيشكر فى الزند وفاروق سلطان وكله موجود فيديوهات صوت وصورة وتابعوا ولا تتجاهلوا الموقف ...رابعا الثورة تتطيح بما قبلها واى شئ ممثل للحكم وارجعوا لتاريخ الثورات كلها اللى نجحت فى وقتها لا استمرت سنيين كى تنجح مثل (ولله المثل الاعلى) ثورات امريكا اللاتينيه (جيفارا) والاخوان زيى ماهما كانوا فصيل يظهر مؤخرا فى كل الاعتصامات والتظاهرات كانوا برضه فصيل فى الحكم ايام مبارك (البرلمان)....الاخوان باعوا الدم والثوار فى مواقف كتير وقريبا كان شكر العسكر وقلادات فضلا عن اتهامات بالبلطجه للثوار وكله موجود فى تاريخ حكم العسكر وبرلمانهم اللى كان عار على مصر ...

مسودة الدستور بقى -- اولا لكى نصل الى كتابة دستور جديد لمصر قمنا بثورة قدم فيها كل المصريين تضحيات ضخمة وبالتالى كان يجب ان يكون الدستور على مستوى التضحيات .
-- لا يصح ان يقول احد الدستور معظمه جيد فجميع الدساتير السابقة كان معظمها جيدا ومصر الثورة تستحق دستور كله جيد وليس دستور اكثره سيئ....

-- هناك بعض الامور لا اقبلها نهائيا فى هذا الدستور مهما كانت المبررات

1- الغاء منصب نائب الرئيس رغم ادراك الجميع لأهميته
2- الماده 10 و 11 مواد مبهمه جدا وغير معروف ايه هو طابع الاسره المصريه الاصيله اللى وفقا لما ينظمه القانون والاسره المصريه بطباعها وعاداتها وقيمها وتقاليدها ولا تحتاج لقوانينكوا دى وبالنسبه لمحكمة الاسره فيه طريقة تفاصيل تانيه للمادة تقدر تاخد بيها الاحكام دى بدون ابهام نص الماده هكذا وليس اصلا من وظيفة الدولة التدخل فى مثل هذا ولكن اظن ان المراد بالماده دى التربيه الاخوانجيه بالوصايا العشر وخلافه وفتح بابا لجماعة الامر بالمعروف والنهى عن المنكر وهذا ما ارفضه تماما خصوصا ان يكون هؤلاء الموجودين ع الساحه بالسب والتكفير لمعارضيهم ...
3- السماح لمزدوجى الجنسية بالترشح لعضوية مجلسى النواب والشورى -- راجعوا شروط الترشح فى المادة 114
4-المادة 139 مادة كوميديه فى الحقيقه وتعليقى عليها محتاج كلام كتير وليه فيها راجعه عن قريب ان شاء الله هنا برضه ..
5- المادة 197 اتنقلت مع تغيير طفيف ى الالفاظ لكن المقد هو ..مادة من وثيقة على السلمى وكلنا نعرف كبائر هذه الوثيقه فى حق مصر والثورة واعترض عليها الاخوان بعد أن رأوا كل القوى الوطنيه منسحبه وكانوا اخر المنسحبين وحزب الوسط كان اول المنسحبين ايام حكم العسكر واتظاهروا مع القوى الوطنيه ضدها وخرج على السلمى على لقاء تليفزيونى اقسم ان الاخوان لم يعترضوا عليها لما قدمها فخرجوا عليه باتهامات انه فلول ومرتشى..
6- السماح بمحاكمة المدنيين امام القضاء العسكرى سقطة فى جبين هذا الدستور مهما كانت المبررات
7- قيام رئيس الجمهورية بتعيين عشر اعضاء مجلس الشورى الذى تحول الى مجلس تشريعى امر ارفضه تماما -- فكل هؤلاء سيكون ولائهم لمن عينهم وليس للوطن - راجعوا المادة 128

8- رئاسة الرئيس للمجلس الأعلى للشرطة ارفضه تماما لأنه بمرور الوقت يجعل الشرطة مهمتها حماية الرئيس وليس الشعب مع انفاق ضعف انفاقات وزارة الصحه عليها فالاولى بالانفاق الصحه والتعليم -- راجعوا المادة 199
9- المادة 219 التى تشرح مبادئ الشريعة ارفضها تماما واعتبرها لغما يفجر المشكلات فى المستقبل القريب واعتبرها رشوة دستورية صريحة للتيار السلفى...
7- تعيين رئيس الجمهورية للهيئات المستقلة والرقابية امر ارفضه تماما فكيف يعين الرئيس من هم مهمتهم تقييم عمله ومن سيرفعون تقاريرهم اليه -- راجعوا المادة 202

10 - عدم جواز حل مجلس الشعب فى السنة الاولى بعد انتخابه مهما كانت الاسباب حتى اذا كانت نفس الاسباب التى ادت الى حل المجلس السابق له -- راجعوا المادة 127

11- الغاء الاشراف القضائى الكامل على الانتخابات ارفضه تماما لا حاليا ولا مستقبلا -- الاشراف القضائى هو الضمان الوحيد لنزاهة الانتخابات...

12- كنت اتمنى ان يتم اقرار نظام الانتخاب بالقائمة للقضاء على القبلية والنزاعات الفردية خاصة فى الريف والصعيد وحتى يتعلم المصريون الاختيار على اساس البرنامج -- اما نظام الخلطة ده فسخيف جدا -- راجعوا المادة 230

13- اقرار الدستور بأغلبية 51% امر لايجوز فاقرار الدستور لابد ان يكون من وجهة نظرى بنسبة 75% على الأقل حتى يكون متوافق عليه فالدساتير تجمع لا تفرق-- راجعوا المادة 225

14- المادة 127 الخاصة بحل مجلس الشعب اذا رفض تشكيل الحكومة مرتين متتاليتين بصراحة صياغتها مبهمة وصعبة الفهم وبالتالى لن احكم عليها حتى الان...

15- الصياغة بصفة عامة ركيكة ومطاطة وتفتح باب الجدل فى العديد من القضايا
هذه بعض الملاحظات على مسودة الدستور




شكرا

ونتشرف بمتابعتك لينا على صفحة 25 يناير ثورة الغضب https://www.facebook.com/25jan.tv





Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.