العودة   منتديات المصطبة > الأقسام العامة > منتدى التنمية البشرية

منتدى التنمية البشرية اكتسب قناعات ومهارات ومعارف جديـدة وصحيحـة لتساعـدك على تطوير نفسـك

الغضب

كاتب الموضوع: Abo3li، فى قسم: منتدى التنمية البشرية


1 
Abo3li

السلام عليكم ورحمة الله وبركاته

الغضب s10.gif (( الغضب )) الغضب s10.gif

كلمة من الصعب جدا يكون ليها تعريف معين أو محدد
لكن كحالة أكيد الكل يعرفها واكيد حاسس بيها من ناحية حاجة معينة
الرئيس المخلوع او حتي من الثورة نفسها
يمكن من ماما أو من بابا
ويمكن من واحد بيرمي ورقة علي الأرض

من الأخر اسبابه لا تنتهي

لكن ف أسباب مهمة نقدر نحصر جزء منها مثل :


الفشل (( وخاصة فشل المحاولة الواحدة ))

الغضب من انتهاك حرمة معينة

الغضب من سلوك الآخرين عموما

طبعا كلنا عارفين بنزهق ليه ؟؟

يجي هنا السؤال :

ازاي اتحكم ف نفسي وقت غضبي
ازاي اتخلص من العصبية عموما
ازاي احول غضبي دا لهدوء واستقرار نفسي
وازاي انا ممكن استفاد من غضبي دا
واخير انا ايه بيحصلي لما اكون ف المود دا
؟؟؟؟


أبدأ باجابة السؤال الأخير :

اولا : الانسان وقت الغضب بيغيب ادراكه الحسي
كتير جدا بنسمعها او بنقولها
( ساعة زهقي مابشوفشي قدامي )
( انا لما بزهق ما اعرفش ابويا )
وكتير أمثلة من كدا

ثانيا : ضغط الدم بيعلى بصورة ملحوظة
دا طبعا ناتج عن نشاط الدورة الدموية
ودا طبعا ناتج عن نشاط ضربات القلب
واللي ناتج عن زيادة الكهربا حواليه
ودا بيكون بسبب :


ثالثا : الادرنالين اللي بيفرزه الجسم عند اي انفعال زائد وخاصة ف الغضب والخوف
واللي بسببه بيتوقف انزيم اسمه علي ما اتذكر
تربتوفان هيدروكساليس
وتعتطيل الانزيم دا بيحول الانسان لغبي مؤقتا
لحد ما تأثير الانفعال يروح لحاله والانسان يبدأ يهدي

(( ممكن تلاحظ بعد الزهق ان اطرافك بترتعش دا بيكون بسبب الادرنالين الكتير اللي بيتفرز ))

رابعا : طبعا بتحس بنفسك قايد نار
وشغاااال شهيق وزفير بسرعة كانك كنت بتجري (( حرامي وطالع يجري والناس وراه بالضبط كدا الغضب s06.gif ))

خامسا : ودي اخطر حاجة ان الانسان لما بيزهق وزي ما قلنا قبل كدا عن نشاط الدورة الدموية ان بيزيد معدل حرق الجلوكوز في الدم
دا بسببه لا قدر يجيلك كدا (( يا ضغط يا سكر ))
ربنا يعافيك ويعافيني يارب ( اللي بيروحوا مننا صغييرين الايام دي ) .

طيب ازاي اتحكم ف غضبي بقي ؟؟؟؟
ها فكر معايا كدا ازاي ؟؟

كل الاديان وكل المبادئ الانسانية بتقول ان التحكم ف الغضب حاجة مهمة جدا ان لم يكن هو الأهم والامثلة والحكم لا حصر لها

جميل جدا انك عارف ان دا مهم

بس لسه مقلناش ازاي ؟؟

نقول :

الغضب دا اكيد مش بيجيلك فجأة كدا
لازم يكون ف حاجة مثيرة ليه
(( حاجة تغيظك كدا الغضب s07.gif ))

ف الوقت دا قبل ما تزهل علي طول ممكن نستغل الوقت
ف تمارين كتير بس انا بحب اتنين منهم جدا

1- العد (( من 1 لحد 10 او لحد 100 )) حسب ما انت حافظ بقي الغضب s14.gif
هههههههه بهزر

لما تعد هتشغل دماغك بحاجة
ولانك قاصد كدا تفكيرك اللاواعي هو كمان هنيشغل بيها
لانه الصلة قوية جدا بين وعيك ولا وعيك وانت صاحي عادي يعني
ومع العد والتركيز فيه هتنشغل بالتدريج

2- تنظيم التنفس
بمعني ان سيادتك تاخد نفس عميق جدا تملي صدرك كله
ويا سلام لو تغمض عينك تبقي باشا والله
وتكتم النفس 5 ثواني مثلا وتخرجه علي اقل من مهلك
وتكرر التمرين تاني بس تخليهم 10 ثواني مثلا

وياسلام عليك ولد لو تعرف تعمل الاتنين مع بعض
تبقي برنس الغضب s12.gif

لو مش عجبك كل الكلام دا انساه واسمع كلام حبيبك المصطفي
بس صلي عليه الاول
لو انت واقف وانت زهقان اقعد لو قاعد نام لو نايم ع السرير انزل ع الارض
(( كدا كدا ماما هي اللي بتغسل ))
وصلي تاني علي النبي دلوقتي ووانت زهقان كمان
وافتكر دايما كلامه ( الحلم سيد الأخلاق )


طيب ازاي اتخلص من العصبية بقي عموما :

في تمرين كويس عن تجربة يعني
اسمه تمرين الاسترخاء


قبل ما تنام حضرتك هتشغل قرآن بصوت قارئ انت بتحبه
- ممكن لو مسلم يعني تشغل مقطوعة موسيقية كلاسيكية هادية كدا تهدي اعصابك وتكون انت بترتاحلها -
نام ع ضهرك بقي يا باشا كدا
مدد رجليك وارخي اعصابهم خالص
ايدك افردها جنبك وسيبها كانها مش بتاعتك
وشك
الفيس دا بقي فيه شوية شغل
عايز سيادتك كدا تبتسم ابتسامة خفيفة الغضب s05.gifعشان الصورة تتطلع حلوة كدا الغضب s01.gif
غمض عينك بقي كفاية كدا عيب يعني
ليه جبينك مشدود ارخيه خالص ( افرديها يا حياتي ... جبنا فيتا المصريين ) الغضب s04.gif
حواجبك مشدودة ليه فكها بقي ع الاخر
وكفاية ضحك كدا
نام بقي مع السلامة يابرنس

وياسلام والله لو تلعب تمرين النفس كمان مرة ف الوقت دا
تبقي حريف بجد

ف تمارين تانية بس مضحكة شوية

يعني مثلا ممكن

تفتك فكك ع الاخر كانك بتتواب كدا بس ع الاخر بقي يععع
وتقفله
وتفتحه شوية
وتقفله
10 مرات بس
والله هتلاقي نفسك سحبت

ملاك يا اخواتي


ازاي بقي استفيد من زهقي دا ؟؟؟
ازي الكلام دا يا عم الحاج انت ؟


اقولك يا سيدي الفاضل :


لما تزهق بتكون جواك طاقة رهيبة
انت بتحس بيها
لان جسمك بيكون مستعد انه يبذل كل طاقته دي ف صورة شغل
(( معلش اصلي بتاع ميكانيكا والطبع بيحن ))
المهم الطاقة اللي في جسمك د خسارة ترميها ف الأرض
يعني لو مثلا بتحاول تعمل حاجة معينة
وفشلت
حاول كمان مرة من غير ملل ولا زهق
افتكر ان جواك طاقة رهيبة ف الوقت دا
وحاول تاني وتالت

وافتكر الطاقة


أخيرا حابب أقول لحضرتك

الحلم سيد الأخلاق
و (( الكاظمين الغيظ ))
يقال ان كاظم الغيظ دا وهو قادر عليه يعني
بيجي يوم القيامة ربنا بيدعوه علي رؤس الاشهاد ويخيره باي الحور العين يشاء
شوف انت كد
ا


يارب يكون اي حد استفاد بأي حاجة
من كلامي المتواضع جدا دا

وشكرا للكل

بقلم : أبو علي


الغضب s12.gif




2 
ςїňĐẹŘēļļa

هههههههههههههههه
توبيك جميل ومفيد والله
بس طويل اوى
انا مش طالبه كل ده فى المسابقة
بس عادى هعتبرو معانا
تسلم على الافادة يا جميل
تقبل مرورى
بالتوفيق


4 
Abo3li

اقتباس: المشاركة الأصلية كتبت بواسطة ςїňĐẹŘēļļa  مشاهدة المشاركة
هههههههههههههههه
توبيك جميل ومفيد والله
بس طويل اوى
انا مش طالبه كل ده فى المسابقة
بس عادى هعتبرو معانا
تسلم على الافادة يا جميل
تقبل مرورى
بالتوفيق

اولا انا مش عامله للمسابقة
ثانيا شكرا جدا ليكي ع المرور والكلام الجميل د



Powered by vBulletin® Copyright ©2000 - 2018, Jelsoft Enterprises Ltd.
المواد المنشورة والمكتوبة فى المنتدى لا تُعبر بالضرورة عن وجهة نظر القائمين عليه ولكنها تعبر عن وجهة نظر كاتبها فقط.