العودة   منتديات المصطبة > الطريق إلى الله > الخيمة الرمضانية

الخيمة الرمضانية قال تعالى: {شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ}


1 
bono

حاسس إني ضيعت كتيــــــــــــــــر .. حاسس أن رمضــــــــان ضاع مني رمضــــــــان ضاع مني :( heart(214).gif

اللي حواليّ ختم... مرة واتنين وثلاثة .. وأنا لسه في الختمة الاولي
واللي بيصلي ب 100 ركعة واللي بيستغفر 1200 مرة واللي بيصلي ب 1000 آيـــــــــــة
وانا في الضياع .. مش عامل حاجة خلاص
ورمضان قرب يخلص وانا مش عارف أعمل إيه ؟

أنا مخنووووووق قوي ..


شيطان واتحبس ..

يبقي هو العيب فيه ..

أنا اللي وحش ..



دا حال ناس كتير قوي مننا .. شايف الناس بتجري لربنا ..

وهو واقف يتفرج ويتحسر علي نفسه .. واقف يبكي وزعلان ونفسه يبقي مع الناس دي .. كان نفسه قوي ربنا يشوفه من أوائل الناس اللي بتجري دي

عارفين مشكلته إيه ؟

مشكلته أنه واقــــــف .. مش بيتحرك زعلان وخلاص

أنت دلوقتي إيه اللي يمنعك إنك تجري مع الناس دي؟

مش عارف مش قادر وحاسس إني عمري ماهقدر ..

مش عارف إيه إحساساتك الكتيرة دي .. كل شويه حاسس حاسس

طب لما انت بتحس قوي كده .. واقف متنح ليه ؟

واقف ليه في مكانك ومش راضي تتحرك .. إنت مش مش قادر

لأ .. إنت مش عاوز

لا والله حرام عليك يا اخي إحسن الظن دا إحنا في شهر كريم

إديك قولت بنفسك شهر كريم .. وربنا أكرم يا اخي .. يعني إنت ممكن تسبق الناس دي كلها لربنا

ياسلااااام .. قولي إزاي ؟

ماشي ياسيدي هاقولك .. بس إدفع




اللهم صلي وسلم علي رسول الله

ماانت شاطر وبتصلي علي النبي أهو ..

إحنا هنتفق مع بعض علي شوية حاجات كده .. مش إنت زعلان وندمان

أيوه

طب قول ورايا .. يارب أنا تبت

يارب أنا تبت

قولها بقلبك .. يارب أنا تبت .. تبت ومش هاعمل كده تاني .. ومش هاتاخر تاني .. تبت يارب من الغفلة .. تبت وندمان والله

خلاص بقي .. نشوف هانفذ التوبة دي إزاي .. لسه فاضل 15 يوم باقين تقدر تعمل فيهم كتير قوي

دا إنت ممكن تختم 5 مرات .. غير الختمة الطويلة قوي اللي انت فيها دي

ياسلام .. إزاي ياعم أنا علي قد حالي مقدرش

يا بني إنت مش تبت

ماحنا قولنا بلاش مش قادر .. تقدر إنت مش كنت بتذاكر وتخلص الكتاب في تلات إيام

القران أسهل مليون مرة .. تنويها إن شاء الله نية لله تختم القران كل ثلات إيام ..وهتقدر ان شاء الله الموضوع بسيط

ده سيدنا عثمان بن عفان ختم القران في ركعة أوتر بها عند الكعبة .. وصحابة كتير ختمه القران في ليله .. الموضوع موضوع همه وحب

بتحبه ولا لأ ؟ وانتوا يالى بتقرأوا دلوقتى بتحبوه ولا لاء؟؟؟
ردوا عليا.... مش سامعة .. قلتوا ايه؟؟؟


ايــــــوه كـــــــــــده


دي أول نقطة .. إتفقنا

ماشي هاجاهد نفسي إن شاء الله


وممكن تصلى السنن بالمصحف علشان تخلصى ختمتك





تاني حاجة ياسيدي .. انت ممكن كل ليلة تكتب من القانتين

مين ده .. أنا ؟!!!!!

أيوه انت .. بإنك تصلي ب100 آيه

كتير قوي 100 آيه دول دا انا بصلي التروايح في الجامع بالعافيه

أنت حافظ سورة تبارك ؟ ..

ايوة الحمد لله

طب كويس .. حافظ سورة النبأ ؟

أيوه الحمد لله حافظها

طب كويس قوي .. دا انت قربت تختم ماشاء الله رمضــــــــان ضاع مني :( icon7.gif



طيب حافظ سورة عبس
او حتى سورة الصافات ومعاها صور تكمل 100 ايه


( طبعاً أو غير الصور دي احنا مش بنحدد المهم يعدوا 100 اية )

انا الحمد حافظ جزء عم كله

طب كويس قوي نعمة وفضل من الله

عارف بقى سورة تبارك وعم وعبس دول أكتر من 120 آيه

ياسلام ..

شوفت .. عشان تعرف أنه الموضوع سهل .. اهو صلي بالسور دي تكتب كل ليلة ان شاء الله من القانتين ،
(( او اي صور تانية زي ما اتفقنا ))

وتيجي إن شاء الله في اليوم اللي هتختم فيه اللي هو بعد تلات إيام
تروح تصلي بجزء عم وتبارك .. دول 1000 ايه عشان تكتب من المقنطرين ( او غيرهم برده

ماشي خلاص لحد كده كويس



تالت حاجة ياسيدي ..عاوزك تستغفر ربنا كتير قوي

حدد لنفسك ساعة في اليوم تستغفر فيها 1000مرة ولا اكتر وتصلي علي النبي شوية وتسبح ربنا شويه واوعى تنسى انت وقاعدة فى المطبخ كمان .. تعملك قد 5000 كده

وطبعا في حاجات أساسية زي السنن وصلاة الضحي واذكار الصباح والمساء

ومتنساش جلسة بعد الفجر لغاية الشروق .. دي بقي كنز ثمين قوي .. في رمضان وغير رمضان وخساااااااااارة يضيع منك

المشكله اني ببقي نعسان قوي بعد الفجر..

يابني جاهد نفسك شويه .. روح صلي في الجامع وقولها بعد الصلاة .. لقيت نفسك نعست .. خلاص اطلع كملها في الشارع .. الموضوع مش نافع خلاص زي بعضه هاسمحلك تقعد علي النت ساعة .. بس ساعة واحدة بس

نعم .. هو انا مش هاقعد علي النت غير ساعة واحدة بس

ليه انت فاكر الناس اللي بتجري لربنا دي عندها وقت تتضيعه علي النت ؟!!!

يابني دا سيدنا عمرو بن العاص كان لما بيمسك المصحف يبكي ويقول
شغلني عنك الجهاد .. مش ال.. نت

خلاص هجاهد نفسي

ربنا يرزقك فيها ثواب حج وعمرة .. وكمان الارزاق توزع في الوقت ده
وعجبا لمن يقسم رزقه وهو نائم .. الموضوع ممكن يبقي صعب في الاول بس بعد كده هتلاقي نفسك اتعودت .



آخر وصيه يابني اللي ممكن تخليك تجري لربنا جري

هاقولك علي باب مش هتلاقيه فيه كتير وممكن يوصلك بسرعة

باب الانكـــــــســــــــــار لله جل وعلا ..

إكسر نفسك بين إديه .. ذل نفسك ليه

إستشعر معني كلمة عبد

كان في واحد إسمه بشر الحافي .. الراجل دا كان عاصي

في يوم من الايام من الايام مر ببيته رجل .. فسمع صوت المعازف

فطرق الباب .. خرجت له الجاريه فسألها صاحب هذا البيت عبد أم حر ؟

فقالت بل حر .. قال نعم حر فلو كان عبد لتأدب بأدب العبودية مع سيده .. ثم انصرف

فسأل بشرٌ الجارية عن الطارق .. فأخبرته

فأسرع ورائه حافـيــــــــــا .. قال أعد علي ما قلت .. فأعاد الرجل مقولته

قال بل عبد بل عبد .. وبقي بشر الحافي العالم الجليل

ذِلّ نفسَك و أظهر الافلاس لله جل وعلا

قوله محتاجك قوي يارب ماتسبنيش .. سامحني يارب مليش حد يسامحني واقبلني

مد إيدك وقوله إكرمني يارب .. انت الملك ومليش حد يمن عليّ غيرك

اسجد سجدة طوييييييييلة وقول له : يارب أنا عصيتك كتير ، وبعدت عنك كتير ، فأمهلتني وأكرمتني ولم تأخذني بذنوبي ، يارب راجعلك متسبنيش وخد بإيدي ، سجد لك سوادي ، وآمن بك فؤادي ، هذي يدي وما جنيتُ على نفسي

رباااااااااه أغلقت الابواب إلا بابك .. فأين لي بملجأ إلا أنت

نفذ زادي وقلت حيلتي وجئتك بك .. يامن لا يرد تائب ناداك..

ربنا يكتبنا وإياكم من عتقائه من النار .. ويجعلنا وإياكم من المقبولين






اللهم آمين آمين آمين




منقول بتصرف




2 
أحبُكَ ربى


رباااااااااه أغلقت الابواب إلا بابك .. فأين لي بملجأ إلا أنت

اللهم انك امرتنا بالتوبة ووعدتنا بالقبول اللهم اجعلنا من عبادك التائبين المخلصين

اللهم وأعنا على ذكرك وشكرك وحسن عبادتك

اللهم تقبل منا رمضان اللهم تقبل منا رمضان اللهم تقبل منا رمضان

جزاكِ الله خيرا اختى الكريمة على التذكرة
وجعلها فى ميزان حسناتك ونفعنا بما علمنا

نفذ زادي وقلت حيلتي وجئتك بك .. يامن لا يرد تائب ناداك..

ربنا يكتبنا وإياكم من عتقائه من النار .. ويجعلنا وإياكم من المقبولين


5 
Hinamori Amu

عندك حق يا بسومة الصراحة أنا فى رمضان السنادى ماشية على قشر بيضة
وكل حاجة بكره بكره وبجد بقيت كسولة آخر حاجة وشكلى مشهمل حتى ختمة
واحدة السنادى ربنا يستر بقى أنا هحاول قد ماقدر الأسبوع ده



Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.