العودة   منتديات المصطبة > الأقسام الأسرية > منتدى الطب والصحة

منتدى الطب والصحة الطب النبوي "البديل"، تغذية وريجيم، صحة المرأة والرجل، العناية بالجسم والبشرة


1 
princess emee

بسم الله الرحمن الرحيم

انا فكرت اعمل موضوع عن الأشعة علشان في ناس كتير ماتعرفش عنه معلومات كافية و للأسف بيتم تشخيصهم غلط و بالتالي بيتعالجوا غلط

انا هحاول اشرح الموضوع بصورة مبسطة شوية علشان الأشعة مكلكعة شوية لدرجة ان في اطباء كتير معلوماتهم في الاشعة زي معلوماتهم عن اللغة اليابانية (بصراحة مش ذنبهم لأن مفيش دراسة علم اشعة خلال ال 7 سنين طب و لكن بتبقي دراسة جديدة تماما بعد التخرج)

ان شاء الله نبدأ مع بعض واحدة واحدة و نوصل لفايدة عامة سوا




2 
princess emee

الحلقة الأولي:

علم الأشعة هو علم تصوير الأجزاء الداخلية لجسم الأنسان مع تشخيص الأمراض الموجودة (التشخيص اهم كتير من مجرد التصوير..و دا للأسف المشكلة الكبيرة اللي بتواجهنا في مصر و هنعرف كمان شوية ليه)


لازم نفرق كويس جدا ان مش كل طرق التصوير بتعتمد علي الأشعة (طبعا كلام غريب و ماحدش فاهم مني حاجة)

هنقول بطريقة تانية

التصوير الأشعاعي يعتمد علي اختراق الجسم بأشعة مؤينة غير مرئية مع التقاط الأشعة بعد الخروج من الجسم علي لواقط حساسة باسلوب معين

اللي بيستخدم الأسلوب ده في التصوير نوعين فقط
1- الأشعة العادية (الأشعة السينية او المتعارف عليه x-ray)
2- الأشعة المقطعية


انما باقي اساليب التصوير لا تعتمد علي الأشعة المؤينة زي الموجات الصوتية و الرنين المغناطيسي

طيب هنستفيد ايه من المعلومة دي ؟؟

ان الأشعة العادية و المقطعية (الاتنين بيستخدموا الأشعة المؤينة) من الضار جدا التعرض ليهم بكثرة
و ان غير مسموح بعملهم للسيدات الحوامل و يفضل عدم تعريض الأطفال ليهم الا في الضرورة

هنعرف تفاصيل اكتر لما نشرح كل نوع تصوير بطريقة منفردة ان شاء الله

معلش استحملوني شوية و ان شاء الله هتدعولي لما اخلص


3 
princess emee

الأشعة العادية = السينية = x-ray



دي ابسط و اسهل و اسرع و ارخص اشعة و الأكثر طلبا من الأطباء


زي ماقولنا في الأول ان دي من الأشعة المؤينة اللي لا يجب عملها للسيدات الحوامل

فكرتها بسيطة جدا

الأشعة بتخرج من الجهاز..تخترق قسم المريض و يتم استقبالها من خلف المريض علي فيلم حساس

اكيد مفيش بيت في مصر او شخص ماعملش اشعة عادية قبل كده
لو عندك فيلم اشعة امسكه و اتفرج عليه

هتلاقي اجزاء سوداء و اجزاء بيضاء (الحقيقة هي شفافه بس معلش عدوها و نعتبرها بيضاء)
الجزء الأسود من فيلم الأشعة هو الجزء اللي وصلته الأشعة بنسبة 100%..يعني الفراغ اللي كان حوالين الجزء اللي بيتصور او الهواء اللي في الرئة بالنسبة لفيلم الصدر
اما الجزء اللأبيض من الفيلم دا معناه ان مفيش اشعة وصلت للفيلم..او بمعني اخر دا مكان عظام حضرتك اللي عكست الأشعة و منعتها انها توصل للفيلم الحساس اللي وراك

فوائد الأشعة العادية
زي ماقلنا رخيصة و سهلة و سريعة

الاضرار
انها نوع من الأشعة الضارة و يفضل عدم التعرض ليها لفترات طويلة او متكررة




تستخدم في ايه الأشعة العادية ؟؟ او بمعني تاني امتي نصور اشعة عادية ؟؟

الأشعة دي بتبين العظام بنسبة جيدة جدا

يعني تعتبر غير مفيدة في تصوير اي جزء من الجسم بخلاف البحث عن مشاكل العظم (باستثناء اشعة الصدر)
في ناس كتير متخيلة ان الاشعة بتصور كل حاجة
يعني واحد مفصل الركبة بيوجعه او الأنكل اتلوي يروح يعمل اشعة علشان يشوف الأربطة بتاعت المفصل
طبعا مش هيبان اي حاجة من دي و الحاجة الوحيدة اللي هنحكم عليها هي العظام (وجود كسر من عدمه - خلع في المفصل - مشاكل المفاصل زي الروماتيزم)


الغلطة القاتلة

دكاترة كتير يقولوا للعيان اعمل اشعة و هاتها من غير تقرير بسرعة
مع كامل احترامي لكل الأطباء من مختلف التخصصات..نظرة عينك غير نظرة اخصائي الاشعة..و هقولكم ليه كمان شوية

معظم العيادات و المستوصفات و المراكز الخيرية مفيهاش فانوس اشعة (علبة وشها الأمامي باغة بلاستيك شفافة و جواها لمبة نيون) و بالتالي الطبيب بيمسك فيلم الأشعة و يبص فوق في اتجاه اللمبة النيون او ضوء الشمس و يقول للمريض..الف سلامة..مفيش كسر و الحمد لله (طبعا مش كل الاطباء بيعملوا كده انا بتكلم عن غلطة بتحصل من البعض)

طبعا الحمد لله انا مش بشكك في قدرة الطبيب انه يشخص وجود كسر من عدمه
لكن الفكرة ان في حاجات تانية في العظام بنبص عليها و الطبيب اللي مش دارس اشعة بتفوت عليه طبعا..و هنا بقي بتبقي المشكلة

التفاصيل في الحلقة القادمة..انتظرونا


4 
princess emee

اقتباس:
سؤال بس
الاشعة المقطعية ثلاثية الابعاد مالتى سليس على القولون بتبين كل حاجة وزيها زى المنظار لو فى ورم او حاجة بتجبها ولا مبتجبهاش ؟؟



في نوعين من الأشعة المقطعية ممكن يفيدوك

الأولي هي العادية بالصبغة (شرب و حقن) و دي لو في ورم في جدار القولون او داخله هتجيبه كويس اوي و كمان توضح تاثيره علي باقي اعضاء البطن و كمان تكشف لو في ثانويات موجودة في الكبد مثلا..بس لو حاجات صغيرة زي diverticulum or polyp مش هيبان بالأشعة دي

التانية هي virtual colonoscopy عن طريق المنظار التخيلي و دي من غير صبغة خالص و بتبقي للقولون بس و تجيب اي حاجة داخلية بس مش هتفيدك في اي حاجة خارج جدار القولون و مش هتبين باقي اعضاء البطن

حاجة مهمة تميز المنظار عن الأشعة المقطعية انك ممكن تاخد عينة من الورم للتحليل..بس تظل المقطعية اسهل و اسرع و بتبين باقي اعضاء البطن بخلاف المنظار



Powered by vBulletin® Copyright ©2000 - 2018, Jelsoft Enterprises Ltd.
المواد المنشورة والمكتوبة فى المنتدى لا تُعبر بالضرورة عن وجهة نظر القائمين عليه ولكنها تعبر عن وجهة نظر كاتبها فقط.